Ezekiel 23 Urdu

۱

اور خُداوند کا کلام مُجھ پر نازِل ہُئوا۔

۲

کہ اَے آدم زاد! دو عَورتیں ایک ہی ماں کی بیِٹیاں تھِیں۔

۳

اُنہوں نے مِصؔر میں بدکاری کی۔ وہ اپنی جوانی میں بدکار بنِیں۔ وہاں اُن کی چھاتِیاں مَلی گئِیں اور وہِیں اُن کے دوشِیزگی کے پِستان مَسلے گئے۔

۴

اُن میں سے بڑی کا نام آہولؔہ اور اُسکی بہن کا آہولؔیِبہ تھا اور وہ دونوں میری ہوگئِیں اور اُن سے بیٹے بیِٹیاں پَیدا ہُوئے اور اُن کے یہ نام اہولؔہ اور آہولؔیِبہ ساؔمریہ و یروشلِؔیم ہیں۔

۵

اور آہولؔہ جب کہ وہ میری تھی بدکاری کرنے لگی اور اپنے یاروں پر یعنی اسُورِیوں پر جو ہمسایہ تھے عاشِق ہُوئی۔

۶

وہ سردار اور حاکِم اور سب کے سب دِل پسند جوان مَرد اور سوار تھے جو گھوڑوں پر سوار ہوتے اور ارغوانی پوشاک پہنتے تھے۔

۷

اور اُس نے اُن سب کے ساتھ جو اسُؔور کے برگُزِیدہ مَرد تھے بدکاری کی اور اُن سب کے ساتھ جِن سے وہ عِشق بازی کرتی تھی اور اُن کے سب بُتوں کے ساتھ ناپاک ہُوئی۔

۸

اُس نے جو بدکاری مِصؔر میں کی تھی اُسے ترک نہ کِیا کیونکہ اُس کی جوانی میں وہ اُس سے ہم آغوش ہُوئے اور اُنہوں نے اُس کے دوشِیزگی کے پِستانوں کو مَسلا اور اپنی بدکاری اس پر اُنڈیل دی۔

۹

اُس لِئے مَیں نے اُسے اُس کے یاروں یعنی اسُوریو ں کے حوالہ کر دِیا جِن پر وہ مَرتی تھی۔

۱۰

اُنہوں نے اُسکو بے ستر کِیا اور اُس کے بیِٹوں اور بیِٹیوں کو چھِین لِیا اور اُسے تلوار سے قتل کِیا۔ پس وہ عَورتوں میں انگُشت نُما ہُوئی کیونکہ اُنہوں نے اُسے عدالت سے سزا دی۔

۱۱

اور اُس کی بہن آہولؔیِبہ نے یہ سب کُچھ دیکھا پر وہ شہوت پرستی میں اُس سے بدتر ہُوئی اور اُس نے اپنی بہن سے بڑھ کر بد کاری کی۔

۱۲

وہ اسُورِیوں پر عاشِق ہُوئی جو سردار اور حاکِم اور اُس کے ہمسایہ تھے جو بھڑکِیلی پوشاک پہنتے اور گھوڑوں پر سوار ہوتے اور سب کے سب دِلپسند جوان مَرد تھے۔

۱۳

اور مَیں نے دیکھا کہ وہ بھی ناپاک ہو گئی۔ اُن دونوں کی ایک ہی روِش تھی۔

۱۴

اور اُس نے بدکاری میں ترقّی کی کیونکہ جب اُس نے دِیوار پر مَردوں کی صُورتیں دیکھیں یعنی کسدیوں کی تصوِیریں جو شنگرف سے کھِنچی ہُوئی تھِیں۔

۱۵

جو پٹکوں سے کمر بستہ اور سروں پر رنگِین پگڑِیاں پہنے تھے اور سب کے سب دیکھنے میں اُمرا اہلِ باؔبل کی مانِند تھے جِن کا وطن کسدِؔستان ہے۔

۱۶

تو دیکھتے ہی وہ اُن پر مَرنے لگی اور اُن کے پاس کسدِؔستان میں قاصِد بھیجے۔

۱۷

پس اہلِ باؔبل اُس کے پاس آ کر عِشق کے بِستر پر چڑھے اور اُنہوں نے اُس سے بدکاری کر کے اُسے آلُودہ کِیا اور وہ اُن سے ناپاک ہُوئی تو اُس کی جان ان سے بیزار ہو گئی۔

۱۸

تب اُس کی بدکاری علانیہ ہُوئی اور اُس کی برہنگی بے ستر ہو گئی۔ تب میری جان اُس سے بےزار ہُوئی جَیسی اُس کی بہن سے بےزار ہو چُکی تھی۔

۱۹

تَو بھی اُس نے اپنی جوانی کے دِنوں کو یاد کرکے جب وہ مِصؔر کی سرزمِین میں بدکاری کرتی تھے بدکاری پر بدکاری کی۔

۲۰

سو وہ پھِر اپنے اُن یاروں پر مَرنے لگی جنکا بدن گدھوں کا سا بدن اور جِنکا اِنزال گھوڑوں کا سا اِنزال تھا۔

۲۱

اِس طرح تُو نے اپنی جوانی کی شہوَت پرستی کوجبکہ مِصری تیری جوانی کی چھاتیوں کے سبب سے تیرے پِستان مَلتے تھے پھِر یاد کِیا۔

۲۲

اِس لِئے اَے اہولؔیِبہ خُداوند خُدا یُوں فرماتا ہے کہ دیکھ مَیں اُن یاروں کو جِن سے تیری جان بےزار ہو گئی ہے اُبھارُوں گا کہ تُجھ سے مُخالفت کریں اور اُن کو بُلا لاﺅُنگا کہ تُجھے چاروں طرف سے گھیر لیں۔

۲۳

اہلِ باؔبل اور سب کسدیوں کو فِقؔود اور شؔوع اور قؔوع اور اُنکے ساتھ تمام اسُوریوں کو۔ سب کے سب دِلپسند جوان مَردوں کو سرداروں اور حاکِموں کو اور بڑے بڑے امِیروں اور نامی لوگوں کو جو سب کے سب گھوڑوں پر سوار ہوتے ہیں تُجھ پر چڑھا لاﺅُنگا۔

۲۴

اور اسلحۂ جنگ اور رتھوں اور چھکڑوں اور اُمّتوں کے انبوہ کے ساتھ تُجھ پر حملہ کریں گے اور ڈھال اور پھری پکڑ کر اور خود پہنکر چاروں طرف سے تُجھے گھیر لینگے۔ مَیں عدالت اُن کو سپُرد کرُونگا اور وہ اپنے آئِین کے مُطابِق تیرا فَیصلہ کریں گے۔

۲۵

اور مَیں اپنی غَیرت کو تیری مُخالِف بناﺅُنگا اور وہ غضَب ناک ہو کر تُجھ سے پیش آئیں گے اور تیری ناک اور تیرے کان کاٹ ڈالیں گے اور تیرے باقی لوگ تلوار سے مارے جائینگے۔ وہ تیرے بیٹوں اور بیِٹیوں کو پکڑ لیں گے اور تیرا بِقیّہ آگ سے بھسم ہو گا۔

۲۶

اور وہ تیرے کپڑے اُتار لینگے اور تیرے نِفیس زیور لُوٹ لے جائینگے۔

۲۷

اور مَیں تیری شہوت پرستی اور تیری بدکاری جو تُو نے مُلکِ مِصؔر میں سِیکھی مَوقُوف کرُونگا یہاں تک کہ تُو اُن کی طرف پھِر آنکھ نہ اُٹھائے گی اور پھِر مِصؔر کو یاد نہ کرے گی۔

۲۸

کیونکہ خُداوند خُدا یُوں فرماتا ہے کہ دیکھ مَیں تُجھے اُن کے ہاتھ میں جِن سے تُجھے نفرت ہے ہاں اُنہی کے ہاتھ میں جِن سے تیری جان بیزار ہے دے دُونگا۔

۲۹

اور وہ تُجھ سے نفرت کے ساتھ پیش آئیں گے اور تیرا سب مال جو تُو نے محِنت سے پَیدا کِیا ہے چھِین لینگے اور تُجھے عُریاں اور برہنہ چھوڑ جائیں گے یہاں تک کہ تیری شہوت پرستی و خباثت اور تیری بدکاری فاش ہو جائیگی۔

۳۰

یہ سب کُچھ تُجھ سے اِس لِئے ہوگا کہ تُو نے بدکاری کے لِئے دِیگر اقوام کا پِیچھا کِیا اور اُن کے بُتوں سے ناپاک ہُوئی۔

۳۱

تُو اپنی بہن کی راہ پر چلی اِس لِئے مَیں اُس کا پِیالہ تیرے ہاتھ میں دُونگا۔

۳۲

خُداوند خُدا یُوں فرماتا ہے کہ تُو اپنی بہن کے پِیالہ سے جو گہرا اور بڑا ہے پِیئگی۔ تیری ہنسی ہو گی اور تُو ٹھٹّھوں میں اُڑائی جائیگی کیونکہ اُس میں بُہت سی سمائی ہے۔

۳۳

تُو مَستی اور سوگ سے بھر جائیگی۔ وِیرانی اور حَیرت کا پِیالہ۔تیری بہن ساؔمریہ کا پیالہ ہے۔

۳۴

تُو اُسے پِئے گی اور نچوڑیگی اور اُس کی ٹھِیکریاں بھی چبا جائے گی اور اپنی چھاتِیاں نوچے گی کیونکہ مَیں ہی نے یہ فرمایا ہے خُداوند خُدا فرماتا ہے۔

۳۵

پس خُداوند خُدا یُوں فرماتا ہے کہ چُونکہ تُو مُجھے بُھول گئی ہے اور مُجھے اپنی پِیٹھ کے پِیچھے پھینک دِیا اِس لِئے اپنی بدذاتی اور بدکاری کی سزا اُٹھا۔

۳۶

پھِر خُداوند نے مُجھے فرمایا اَے آدم زاد کِیا تُو آہولؔہ اور آہولِؔیبہ پر اِلزام نہ لگائے گا؟ تُو اُن کے گِھنَونے کام اُن پر ظاہِر کر۔

۳۷

کیونکہ اُنہوں نے بدکاری کی اور اُن کے ہاتھ خُون آلُودہ ہیں۔ ہاں اُنہوں نے اپنے بُتوں سے بدکاری کی اور اپنے بیٹوں کو جو مُجھ سے پیدا ہُوئے آگ سے گُذارا کہ بُتوں کی نذر ہو کر ہلاک ہوں۔

۳۸

اِس کے سِوا اُنہوں نے مُجھ سے یہ کِیا کہ اُسی دِن اُنہوں نے میرے مَقدِس کو ناپاک کِیا اور میرے سبتوں کی بے حُرمتی کی۔

۳۹

کیونکہ جب وہ اپنی اَولاد کو بُتوں کے لِئے زبح کر چُکیِں تو اُسی دِن میرے مَقدِس میں داخِل ہُوئِیں تاکہ اُسے ناپاک کریں اور دیکھ اُنہوں نے میرے گھر کے اندر اَیسا کام کِیا۔

۴۰

بلکہ تُم نے دُور سے مَرد بُلائے جِن کے پاس قاصِد بھیجا اور دیکھ وہ آئے جِن کے لِئے تُو غُسل کِیا اور آنکھوں میں کاجل لگایا اور بناﺅ سِنگار کِیا۔

۴۱

اور تُو نِفیس پلنگ پر بَیٹھی اور اُس کے پاس دستر خوان تیّار کِیا اور اُس پر تُو نے میرا بخُور اور میرا عِطر رکھّا۔

۴۲

اور ایک عیّاش جماعت کی آواز اُس کے ساتھ تھی اور عام لوگوں کے علاوہ بیابان سے شرابِیوں کو لائے اور اُنہوں نے اُن کے ہاتھوں میں کنگن اور سروں پر خُوشنُما تاج پہنائے۔

۴۳

تب مَیں نے اُسکی بابت جو بدکاری کرتے کرتے بُڑھیا ہو گئی تھی کہا اب یہ لوگ اُس سے بدکاری کرینگے اور وہ اُن سے کرے گی۔

۴۴

اور وہ اُس کے پاس گئے جِس طرح کِسی کسبی کے پاس جاتے ہیں اُسی طرح وہ اُن بدذات عَورتوں اہولؔیہ اور اہولِؔیبہ کے پاس گئے۔

۴۵

لیکن صادِق آدمی اُن پر وہ فتویٰ دینگے جو بدکار اور خُونی عَورتوں پر دِیا جاتا ہے کیونکہ وہ بدکار عَورتیں ہیں اور اُن کے ہاتھ خُون آلُودہ ہیں۔

۴۶

کیونکہ خُداوند خُدا یُوں فرماتا ہے کہ مَیں اُن پر ایک گُروہ چڑھا لاﺅُنگا اور اُن کو چھوڑ دُونگا کہ اِدھر اُدھر دھکّے کھاتی پھِریں اور غارت ہوں۔

۴۷

اور وہ گروہ اُن کو سنگسار کرے گی اور اپنی تلواروں سے اُن کو قتل کرےگی۔ اُن کے بیٹوں اور بیِٹیوں کو ہلاک کرے گی اور اُن کے گھروں کو آگ سے جلا دے گی۔

۴۸

یُوں مَیں بدکاری کو مُلک سے مَوقُوف کرُونگا تاکہ سب عَورتیں عِبرت پذِیر ہوں اور تُمہاری مانِند بدکاری نہ کریں۔

۴۹