Numbers 36 Urdu

From Textus Receptus

Jump to: navigation, search
36 گنتی

۱

اور بنی یُوسف کے گھرانوں میں سے بنی جِلعاد بِن مکؔیِر بِن منَسّؔی کے آبائی خاندانوں کے سردار مُؔوسیٰ اور اُن امِیروں کے پاس جا کر جو بنی اِسرائیل کے آبائی خاندانوں کے سردار تھے کہنے لگے کہ۔

۲

خُداوند نے ہمارے مالِک کو حُکم دِیا تھا کہ قُرعہ ڈال کر یہ مُلک مِیراث کے طَور پر بنی اِسرائیل کو دینا اور ہمارے مالِک کو خُداوند کی طرف سے حُکم مِلا تھا کہ ہمارے بھائی صلافِؔحاد کی مِیراث اُسکی بیِٹیوں کو دی جائے۔

۳

لیکن اگر وہ بنی اِسرائیل کے اَور قبِیلوں کے آدمِیوں سے بیاہی جائیں تو اُن کی مِیراث ہمارے باپ دادا کی مِیراث سے نِکل کر اُس قبِیلہ کی مِیراث میں شامِل کی جائے گی جِس میں وہ بیاہی جائیں گی۔ یُوں وہ ہمارے قُرعہ کی مِیراث سے الگ ہو جائیگی۔

۴

اور جب بنی اِسرائیل کا سالِ یوبلی آئے گا تو اُن کی مِیراث اُسی قبِیلہ کی مِیراث سے مُلحِق کی جائے گی جِس میں وہ بیاہی جائیں گی۔ یُوں ہمارے باپ دادا کے قبِیلہ کی مِیراث سے اُن کا حِصّہ نِکل جائے گا۔

۵

تب مُؔوسیٰ نے خُداوند کے کلام کے مُطابِق بنی اِسرائیل کو حُکم دِیا اور کہا کہ بنی یُؔوسف کے قبِیلہ کے لوگ ٹھِیک کہتے ہیں۔

۶

سو صلافؔحِاد کی بیِٹیوں کے حق میں خُداوند کا حُکم یہ ہے کہ وہ جِنکو پسند کریں اُن ہی سے بیاہ کریں لیکن اپنے باپ دادا کے قبِیلہ کے خاندانوں میں ہی بیاہی جائیں۔

۷

یُوں بنی اِسرائیل کی مِیراث ایک قبِیلہ سے دُوسرے قبِیلہ میں نہیں جانے پائے گی کیونکہ ہر اِسرائیلی کو اپنے باپ دادا کے قبِیلہ کی مِیراث کو اپنے قبضہ میں رکھنا ہوگا۔

۸

اور اگر بنی اِسرائیل کے کِسی قبِیلہ میں کوئی لڑکی ہو جو مِیراث کی مالِک ہو تو وہ اپنے باپ کے قبِیلہ کے کِسی خاندان میں بیاہ کرے تاکہ ہر اِسرائیلی اپنے باپ دادا کی مِیراث پر قائِم رہے۔

۹

یُوں کِسی کی مِیراث ایک قبِیلہ سے دُوسرے قبِیلہ میں نہیں جانے پائے گی کیونکہ بنی اِسرائیل کے قبِیلوں کو لازِم ہے کہ اپنی اپنی مِیراث اپنے اپنے قبضہ میں رکھّیں۔

۱۰

اور صلاؔ فحِاد کی بیِٹیوں نے جَیسا خُداوند نے مُؔوسیٰ کو حُکم دِیا تھا وَیسا ہی کِیا۔

۱۱

کیونکہ مَؔحلاہ اور تِرضؔاہ اور حُؔجلاہ اور مِلؔکاہ اور نُؔوعاہ جو صلافؔحِاد کی بیِٹیاں تھِیں وہ اپنے چچیرے بھائِیوں کے ساتھ بیاہی گِئیں۔

۱۲

یعنی وہ یُؔوسف کے بیٹے منَسّؔی کی نسل کے خاندانوں میں بیاہی گِئیں اور اُنکی مِیراث اُنکے آبائی خاندان کے قبِیلہ میں قائِم رہی۔

۱۳

جو احکام اور فَیصلے خُداوند نے مُؔوسیٰ کی معرِفت مؔوآب کے مَیدانوں میں جو یِریحُؔو کے مُقابِل یَؔردن کے کنارے واقِع ہیں بنی اِسرائیل کو دِئے وہ یِہی ہیں۔

Views
Personal tools
Navigation
Toolbox