Numbers 31 Urdu

From Textus Receptus

Jump to: navigation, search
31 گنتی

۱

پھِر خُداوند نے مُؔوسیٰ سے کہا۔

۲

مِدیانِیوں سے بنی اِسرائیل کا اِنِتقام لے۔ اِسکے بعد تُو اپنے لوگوں میں جا مِلے گا۔

۳

تب مُؔوسیٰ نے لوگوں سے کہا اپنے میں سے جنگ کے لِئے آدمِیوں کو مُسلّح کرو تاکہ وہ مِدیانِیوں پر حملہ کریں اور مِدیانِیوں سے خُداوند کا اِنِتقام لیں۔

۴

اور اِسرائؔیل کے سب قبِیلوں میں سے فی قبِیلہ ایک ہزار آدمی لے کر جنگ کے لِئے بھیجنا۔

۵

سو ہزاروں ہزار بنی اِسرائیل میں سے فی قبِیلہ ایک ہزار کے حِساب سے بارہ ہزار مُسلّح آدمی جنگ کے لِئے چنے گئے۔

۶

یُوں مُؔوسیٰ نے ہر قبِیلہ ایک ہزار آدمِیوں کو جنگ کے لِئے بھیجا اورا لِؔیعزر کاہِن کے بیٹے فِنیحاؔس کو بھی جنگ پر روانہ کِیا اور مَقدِس کے ظرُوف اور بُلند آواز کے نرسِنگے اُسکے ساتھ کر دِئے۔

۷

اور جَیسا خُداوند نے مُؔوسیٰ کو حُکم دِیا تھا اُس کے مُطابِق اُنہوں نے مِدیانِیوں سے جنگ کی اور سب مَردوں کو قتل کِیا۔

۸

اور اُنہوں نے اُن کے مقتُولوں کے سِوا عوّؔی اور رقؔم اور صُؔور اور حؔور اور ربؔع کو بھی جو مِؔدیان کے پانچ بادشاہ تھے جان سے مارا اور بعؔور کے بیٹے بلؔعام کو بھی تلوار سے قتل کِیا۔

۹

اور بنی اِسرائیل نے مِؔدیان کی عَورتوں اور اُن کے بچّوں کو اسِیر کِیا اور اُن کے چَوپائے اور بھیڑ بکرِیاں اور مال و اسباب سب کُچھ لُوٹ لِیا۔

۱۰

اور اُن کی سکُونت گاہوں کے سب شہروں کو جِن میں وہ رہتے تھے اور اُن کی سب چھاؤنیوں کو آگ سے پُھونک دِیا۔

۱۱

اور اُنہوں نے سارا مال غنِیمت اور سب اسِیر کیا اِنسان اور کیا حَیوان ساتھ لِئے۔

۱۲

اور اُن اسِیروں اور مالِ غنِیمت کو مُؔوسیٰ اور الِؔیعزر کاہِن اور بنی اِسرائیل کی ساری جماعت کے پاس اُس لشکر گاہ میں لے آئے جو یرِیحُؔو کے مُقابِل یَؔردن کے کنارے کنارے مؔوآب کے مَیدانوں میں تھی۔

۱۳

تب مُؔوسیٰ اور الِؔیعزر کاہِن اور جماعت کے سب سردار اُنکے اِستِقبال کے لِئے لشکر گاہ کے باہر گئے۔

۱۴

اور مُؔوسیٰ اُن فوجی سرداروں پر جو ہزاروں اور سیکڑوں کے سردار تھے اور جنگ سے لَوٹے تھے جھلّایا۔

۱۵

اور اُن سے کہنے لگا کیا تُم نے سب عَورتیں جِیتی بچا رکھّی ہیں؟۔

۱۶

دیکھو اِن ہی نے بلؔعام کی صلاح سے فغُؔور کے مُعاملہ میں بنی اِسرائیل سے خُداوند کی حُکم عدُولی کرائی اور یُوں خُداوند کی جماعت میں وبا پَھیلی۔

۱۷

اِس لِئے اِن بچّوں میں جِنتے لڑکے ہیں سب کو مار ڈالو اور جِتنی عَورتیں مَرد کا مُنہ دیکھ چُکی ہیں اُن کو قتل کر ڈالو۔

۱۸

لیکن اُن لڑکِیوں کو جو مَرد سے واقِف نہیں اور اچُھوتی ہیں اپنے لِئے زِندہ رکھّو۔

۱۹

اور تُم سات دِن تک لشکر گاہ کے باہر ہی ڈیرے ڈالے پڑے رہو اور تُم میں سے جِتنوں نے بھی کِسی آدمی کو جان سے مارا ہو اور جِتنوں نے کِسی مقتُول کا چُھؤا ہو وہ سب اپنے آپ کو اور اپنے قَیدیوں کو تِیسرے دِن اور ساتویں دِن پاک کریں۔

۲۰

تُم اپنے سب کپڑوں اور چمڑے کی سب چِیزوں کو اور بکری کے بالوں کی بُنی ہُوئی چِیزوں کو اور لکڑی کے سب برتنوں کو پاک کرنا۔

۲۱

اور الِؔیعزر کاہِن نے اُن سِپاہِیوں سے جو جنگ پر گئے تھے کہا کہ شرِیعت کا وہ آئِین جِسکا حُکم خُداوند نے مُؔوسیٰ کو دِیا یِہی ہے کہ۔

۲۲

سونا اور چاندی اور پِیتل اور لوہا اور رانگا اور سِیسا۔

۲۳

غرض جو کُچھ آگ میں ٹھہر سکے وہ سب تُم آگ میں ڈالنا۔ تب وہ صا ف ہوگا تَو بھی ناپاکی دُور کرنے کے پانی سے اُسے پاک کرنا پڑے گا اور جو کُچھ آگ میں نہ ٹھہر سکے اُسے تُم پانی میں ڈالنا۔

۲۴

اور تُم ساتویں دِن اپنے کپڑے دھونا تب تُم پاک ٹھہرو گے۔ اِس کے بعد لشکر گاہ میں داخِل ہونا۔

۲۵

اور خُداوند نے مُؔوسیٰ سے کہا کہ۔

۲۶

الِؔیعزر کاہِن اور جماعت کے آبائی خاندانوں کے سرداروں کو ساتھ لے کر تُو اُن آدمِیوں اور جانوروں کو شُمار کر جو لُوٹ میں آئے ہیں۔

۲۷

اور لُوٹ کے اِس مال کو دو حِصّوں میں تقِسیم کر کے ایک حِصّہ اُن جنگی مَردوں کو دے جو لڑائی میں گئے تھے اور دُوسرا حِصّہ جماعت کو دے۔

۲۸

اور اُن جنگی مَردوں سے جو لڑائی میں گئے تھے خُداوند کے لِئے خواہ آدمی ہوں یا گائے بَیل یا گدھے یا بھیڑ بکرِیاں ہر پانچسَو پِیچھے ایک کو حِصّہ کے طَور پر لے۔

۲۹

اِن ہی کے نِصف میں سے اِس حِصّہ کو لے کر الِؔیعزر کاہِن کو دینا تاکہ یہ خُداوند کے حضُور اُٹھانے کی قُربانی ٹھہرے۔

۳۰

اور بنی اِسرائیل کے نِصف میں سے خواہ آدمی ہوں یا گائے بَیل یا گدھے یا بھیڑ بکریاں یعنی سب قِسم کے چَوپایوں میں سے پچاس پچاس پِیچھے ایک ایک لے کر لاوِیوں کو دینا جو خُداوند کے مسکن کی مُحافظت کرتے ہیں۔

۳۱

چُنانچہ مُؔوسیٰ اور الِؔیعزر کاہِن نے جَیسا خُداوند نے مُؔوسیٰ سے کہا تھا وَیسا ہی کِیا۔

۳۲

اور جو کُچھ مالِ غنِیمت جنگی مَردوں کے ہاتھ آیا تھا اُسے چھوڑ کر لُوٹ کے مال میں چھ لاکھ پچھتّر ہزار بکرِیاں تھِیں۔

۳۳

اور بہتّر ہزار گائے بَیل۔

۳۴

اور اِکسٹھ ہزار گدھے۔

۳۵

اور نُفُوسِ اِنسانی میں سے بتّیِس ہزار اَیسی عَورتیں جو مَرد سے ناواقف اور اچُھوتی تھِیں۔

۳۶

اور لُوٹ کے مال کے اُس نصف میں جو جنگی مَردوں کا حِصّہ تھا تِین لاکھ سیَنتِیس ہزار پانچ سَو بھیڑ بکرِیاں تِھیں۔

۳۷

جِن میں سے چھ سَو پچھتّر بھیڑ بکرِیاں خُداوند کے حِصّہ کے لِئے تِھیں۔

۳۸

اور چھتّیِس ہزار گائے بَیل تھے جِن میں سے بہتّر خُداوند کے حِصّہ کے تھے۔

۳۹

اور تِیس ہزار پانچ سَو گدھے تھے جِن میں سے اِکسٹھ گدھے خُداوند کے حِصّہ کے تھے۔

۴۰

اور نُفُوسِ اِنسانی کا شُمار سولہ ہزار تھا جِن میں سے بتّیِس جانیں خُداوند کے حِصّہ کی تھِیں۔

۴۱

سو مُؔوسیٰ نے خُداوند کے حُکم کے مُوافِق اُس حِصّہ کو جو خُداوند کے اُٹھانے کی قُربانی تھی الِؔیعزر کاہِن کو دِیا۔

۴۲

اب رہا بنی اِسرائیل کا نِصف حِصّہ جِسے مُؔوسیٰ نے جنگی مَردوں کے حِصّہ سے الگ رکھّا تھا۔

۴۳

سو اِس نِصف میں بھی جو جماعت کو دِیا گیا تِین لاکھ سَینتِیس ہزار پانچ سَو بھیڑ بکرِیاں تھِیں۔

۴۴

اور چھتّیِس ہزار گائے بَیل۔

۴۵

اور تِیس ہزار پانچ سَو گدھے۔

۴۶

اور سولہ ہزار نُفُوسِ اِنسانی۔

۴۷

اور بنی اِسرائیل کے اِس نِصف میں سے مُؔوسیٰ نے خُداوند کے حُکم کے مُوافِق کِیا اِنسان کیا حَیوان ہر پچاس پِیچھے ایک کو لے کر لاوِیوں کو دِیا جو خُداوند کے مسکن کی مُحافظت کرتے تھے۔

۴۸

تب وہ فوجی سردار جو ہزاروں اور سَیکڑوں سِپاہیوں کے سردار تھے مُؔوسیٰ کے پاس آ کر۔

۴۹

اُس سے کہنے لگے کہ تیرے خادِموں نے اُن سب جگنی مَردوں کو جو ہمارے ماتحت ہیں گِنا اور اُن میں سے ایک جوان بھی کم نہ ہُئوا۔

۵۰

سو ہم میں سے جو کُچھ جِس کے ہاتھ لگا یعنی سونے کے زیور اور پازیب اور کنگن اور انگُوٹھِیاں اور مُندرے اور بازُو بند یہ سب ہم خُداوند کے ہدیہ کے طَور پر لے آئے ہیں تاکہ ہماری جانوں کے لِئے خُداوند کے حضُور کفّارہ دِیا جائے۔

۵۱

چُنانچہ مُؔوسیٰ اور الِؔیعزر کاہِن نے اُن سے یہ سب سونے کے گھڑے ہُوئے زیور لے لِئے۔

۵۲

اور اُس ہدیہ کا سارا سونا جو ہزاروں اور سَیکڑوں کے سرداروں نے خُداوند کے حضُور گُذرانا وہ سولہ ہزار سات سَو پچاس مِثقال تھا۔

۵۳

کیونکہ جنگی مَردوں میں سے ہر ایک کُچھ نہ کُچھ لُوٹ کر لے آیا تھا۔

۵۴

سو مُؔوسیٰ اور الِؔیعزر کاہِن نے اُس سونے کو جو اُنہوں نے ہزاروں سَیکڑوں کے سرداروں سے لِیا تھا خَیمۂِ اِجتماع میں لائے تاکہ وہ خُداوند کے حضُور بنی اِسرائیل کی یاد گار ٹھہرے۔

Views
Personal tools
Navigation
Toolbox