Judges 6 Urdu

۱

اور بنی اِسرائیل نے خُداوند کے آگے بدی کی اور خُداوند نے اُن کو سات برس تک مِدیانیوں کے ہاتھ میں رکھّا۔

۲

اور مِدیانیوں کا ہاتھ اِسرائیلِیوں پر غالِب ہُئوا اور مِدیانیوں کے سبب سے بنی اِسرائیل نے اپنے لئِے پہا ڑوں میں کھوہ اور غار اور قلعے بنالئِے۔

۳

اور اَیسا ہوتا تھا کہ جب بنی اِسرائیل کُچھ بوتے تھے تو مِدیانی اور عمالِیقی اور اہلِ مشرِق اُن پر چڑھ آتے تھے۔

۴

اور اُن کے مُقابِل ڈیرے لگا کرغزّؔہ تک کھیتوں کی پَیداوار کو برباد کر ڈالتے اور بنی اِسرائیل کے لئِے نہ تو کُچھ مُعاش نہ بھیڑ بکری نہ گائے بَیل نہ گدھا چھوڑتے تھے۔

۵

کیونکہ وہ اپنے چَوپاﺅں اور ڈیروں کو ساتھ لے کر آتے اور ٹِڈّیوں کے دَل کی مانِند آتے اور وہ اور اُن کے اُونٹ بے شُمار ہوتے تھے۔ یہ لوگ مُلک کو تباہ کرنے کے لئِے آ جاتے تھے۔

۶

سو اِسرائیلی مِدیانیوں کے سبب سے نِہایت خستہ حال ہوگئے اور بنی اِسرائیل خُداوند سے فریاد کرنے لگے۔

۷

اور جب بنی اِسرائیل مِدیانیوں کے سبب سے خُداوند سے فریاد کرنے لگے۔

۸

تو خُداوند نے بنی اِسرائیل کے پاس ایک نبی کو بھیجا۔ اُس نے اُن سے کہا کہ خُداوند اِسرائؔیل کا خُدا یُوں فرماتا ہے کہ مَیں تُم کو مِصؔر سے لایا اور مَیں نے تُم کوغُلامی کے گھر سے باہر نِکالا۔

۹

مَیں نے مِصریوں کے ہاتھ سے اُن سبھوں کے ہاتھ سے جو تُم کو ستاتے تھے تُم کو چُھڑایا اور تُمہارے سامنے سے اُن کو دفع کِیا اور اُن کا مُلک تُم کو دِیا۔

۱۰

اور مَیں نے تُم سے کہا تھا کہ خُداوند تُمہارا خُدا مَیں ہُوں۔ سو تُم اُن امورِیوں کے دیوتاﺅں سے جِن کے مُلک میں بستے ہو مت ڈرنا پر تُم نے میری بات نہ مانی۔

۱۱

پھِر خُداوند کا فرِشتہ آ کر عُؔفرہ میں بلُوط کے ایک درخت کے نِیچے جو یُؔوآس ابیعزری کا تھا بَیٹھا اور اُس کا بیٹا جِدعؔون مَے کے ایک کولُھو میں گیہُوں جھاڑ رہا تھا تاکہ اُس کو مِدیانیوں سے چِھپا رکھّے۔

۱۲

اور خُداوند کا فرِشتہ اُسے دِکھائی دے کر اُس سے کہنے لگا کہ اَے زبردست سُورما! خُداوند تیرے ساتھ ہے۔

۱۳

جِدعؔون نے اُس سے کہا اَے میرے مالِک! اگر خُداوند ہی ہمارے ساتھ ہے تو ہم پر یہ سب حادِثے کیوں گُزرے اور اُس کے وہ سب عجِیب کام کہاں گئے جِن کا ذِکر ہمارے باپ دادا ہم سے یُوں کرتے تھے کہ کیا خُداوند ہی ہم کو مِصؔر سے نہیں نِکال لایا؟ پر اب تو خُداوند نے ہم کو چھوڑ دِیا اور ہم کو مِدیانیوں کے ہاتھ میں کر دِیا۔

۱۴

تب خُداوند نے اُس پر نِگاہ کی اور کہا کہ تُو اپنے اِسی زور میں جا اور بنی اِسرائیل کو مِدیانیوں کے ہاتھ سے چُھڑا۔ کیا مَیں نے تُجھے نہیں بھیجا؟۔

۱۵

اُس نے اُس سے کہا اَے مالِک! مَیں کِس طرح بنی اِسرائیل کو بچاﺅں؟ میرا گھرانا منسّؔی میں سب سے غرِیب ہے اور مَیں اپنے باپ کے گھر میں سب سے چھوٹا ہُوں۔

۱۶

خُداوند نے اُس سے کہا مَیں ضرُور تیرے ساتھ ہُوں گا اور تُو مِدیانیوں کو اَیسا مار لے گا جَیسے ایک آدمی کو۔

۱۷

تب اُس نے اُس سے کہا کہ اب اگر مُجھ پر تیرے کرم کی نظر ہُوئی ہے تو اِس کا مُجھے کوئی نِشان دِکھا کر مُجھ سے تُو ہی باتیں کرتا ہے۔

۱۸

اور مَیں تیری مِنّت کرتا ہُوں کہ تُو یہاں سے نہ جا جب تک مَیں تیرے پاس پھِر نہ آﺅُں اور اپنا ہدیہ نِکال کر تیرے آگے نہ رکُھّوں۔ اُس نے کہا کہ جب تک تُو پھِر آ نہ جائے مَیں ٹھہرا رہُوں گا۔

۱۹

تب جِدعؔون نے جا کر بکری کا ایک بچّہ اور ایک ایفہ آٹے کی فطِیری روٹِیاں تیّار کِیں اور گوشت کو ایک ٹوکری میں اور شوربا ایک ہانڈی میں ڈال کر اُس کے پاس بلُوط کے درخت کے نِیچے لا کر گُذرانا۔

۲۰

تب خُدا کے فرِشتہ نے اُس سے کہا اِس گوشت اور فطِیری روٹِیوں کو لے جا کر اُس چٹان پر رکھ اور شوربا کو اُنڈیل دے۔ اُس نے وَیسا ہی کِیا۔

۲۱

تب خُداوند کے فرِشتہ نے اُس عصا کی نوک سے جو اُس کے ہاتھ میں تھا گوشت اور فطِیری روٹِیوں کو چُھؤا اور اُس پتّھر سے آگ نِکلی اور اُس نے گوشت اور فطِیری روٹِیوں کو بھسم کر دِیا۔ تب خُداوند کا فرِشتہ اُس کی نظر سے غائِب ہو گیا۔

۲۲

اور جِدعؔون نے جان لِیا کہ وہ خُداوند کا فرِشتہ تھا۔ سو جِدعؔون کہنے لگا افسوس ہے اَے مالِک خُداوند کہ مَیں نے خُداوند کے فرِشتہ کو رُوبرُو دیکھا۔

۲۳

خُداوند نے اُس سے کہا تیری سلامتی ہو! خَوف نہ کر۔ تُو مَرے گا نہیں۔

۲۴

تب جِدعؔون نے وہاں خُداوند کے لئِے مذبح بنایا اور اُس کا نام یہؔواہ سلوم رکھّا اور وہ ابیعزریوں کے عُؔفرہ میں آج تک مَوجُود ہے۔

۲۵

اور اُسی رات خُداوند نے اُسے کہا کہ اپنے باپ کا جوان بَیل یعنی وہ دُوسرا بَیل جو سات برس کا ہے لے اور بعؔل کے مذبح کو جو تیرے باپ کا ہے ڈھا دے اور اُس کے پاس کی یسِیرت کو کاٹ ڈال۔

۲۶

اور خُداوند اپنے خُدا کے لئِے اِس گڑھی کی چوٹی پر قاعِدہ کے مُطابِق ایک مذبح بنا اور اُس دُوسرے بَیل کو لیکر اُس یسِیرت کی لکڑی سے جِسے تُو کاٹ ڈالے گا سوختنی قُربانی گُذران۔

۲۷

تب جِدعؔون نے اپنے نَوکروں میں سے دس آدمِیوں کو ساتھ لیکر جَیسا خُداوند نے اُسے فرمایا تھا کِیا اور چُونکہ وہ یہ کام اپنے باپ کے خاندان اور اُس شہر کے باشِندوں کے ڈر سے دِن کو نہ کر سکا اِسلئِے اُسے رات کو کِیا۔

۲۸

جب اُس شہر کے لوگ صُبح سویرے اُٹھے تو کیا دیکھتے ہیں کہ بعؔل کا مذبح ڈھایا ہُئوا اور اُس کے پاس کی یسِیرت کٹی ہُوئی اور اُس مذبح پر جو بنایا گیا تھا وہ دُوسرا بَیل چڑھایا ہُئوا ہے۔

۲۹

اور وہ آپس میں کہنے لگے کِس نے یہ کام کِیا؟ اور جب اُنہوں نے تحقِیقات اور پُرسِش کی تو لوگوں نے کہا کہ یُؔوآس کے بیٹے جِدعؔون نے یہ کام کِیا ہے۔

۳۱

تب اُس شہر کے لوگوں نے یُؔوآس سے کہا کہ اپنے بیٹے کو نِکال لا تاکہ قتل کِیا جائے اِسلئِے کہ اُس نے بعؔل کا مذبح ڈھا دِیا اور اُس کے پاس کی یسِیرت کاٹ ڈالی ہے۔

۳۲

یُؔوآس نے اُن سبھوں کو جو اُس کے سامنے کھڑے تھے کہا کیا تُم بعؔل کے واسطے جھگڑا کرو گے یا تُم اُسے بچا لو گے؟ جو کوئی اُس کی طرف سے جھگڑا کرے وہ اِسی صُبح مارا جائے۔ اگر وہ خُدا ہے تو آپ ہی اپنے لئِے جھگڑے کیونکہ کِسی نے اُسکا مذبح ڈھا دِیا ہے۔

۳۳

اِس لئِے اُس نے اُس دِن جِدعؔون کا نام یہ کہہ کر یرُبّؔعل رکھّا کہ بعؔل آپ اِس سے جھگڑ لے اِس لئِے کہ اِس نے اُس کا مذبح ڈھا دِیا ہے۔

۳۴

تب سب مِدیانی اور عمالِیقی اور اہلِ مشرِق اِکٹّھے ہُوئے اور پار ہو کر یِزرعؔیل کی وادی میں اُنہوں نے ڈیرا کِیا۔

۳۵

تب خُداوند کی رُوح جِدعؔون پر نازِل ہُوئی سو اُس نے نر سِنگا پُھونکا اور ابیعؔزر کے لوگ اُس کی پَیروی میں اِکٹّھے ہُوئے۔

۳۶

پھِر اُس نے سارے منسّؔی کے پاس قاصِد بھیجے۔ سو وہ بھی اُس کی پَیروی میں فراہم ہُوئے اور اُس نے آشؔر اور زبُولُؔون اور نفتالؔی کے پاس بھی قاصِد روانہ کئِے۔سو وہ اُن کے اِستقبال کو آئے۔

۳۷

تب جِدعؔون نے خُدا سے کہا کہ اگر تُو اپنے قَول کے مُطابِق میرے ہاتھ کے وسِیلہ سے بنی اِسرائیل کو رہائی دینی چاہتا ہے۔

۳۸

تو دیکھ مَیں بھیڑ کی اُون کھلیِہان میں رکھ دُونگا سو اگر اوس فقط اُون ہی پر پڑے اور آس پاس کی زمِین سب سُوکھی رہے تو مَیں جان لُونگا کہ تُو اپنے قَول کے مُطابِق بنی اِسرائیل کو میرے ہاتھوں کے وسِیلہ سے رہائی بخشے گا۔

۳۹

اور اَیسا ہی ہُئوا کیونکہ وہ صُبح کو جو سویرے اُٹھا اور اُس اُون کو دبایا اور اُون میں سے اوس نچوڑی تو پِیالہ بھر پانی نِکلا۔

۴۰

تب جِدعؔون نے خُدا سے کہا کہ تیرا غُصّہ مُجھ پر نہ بھڑکے۔ مَیں فقط ایک بار اَور عرض کرتا ہُوں۔ مَیں تیری مِنّت کرتا ہُوں کہ فقط ایک بار اَور اِس اُون سے آزمائش کر لُوں۔ اب صِرف اُون ہی اُون خُشک رہے اور آس پاس کی سب زمِین پر اوس پڑے۔

۴۱